Çempionatın açılış oyunu Gəncə şəhərində “Gəncə” və “AZERRAIL” komandaları arasında baş tutub. Gəncə İdman Sarayında təşkil olunan qarşılaşmanın qalibi tay-brekdə müəyyən olunub. “AZERRAIL” komandası oyunu 3:2 hesabı ilə qalib başa vurub.

Turun növbəti oyunu oktyabrın 15-də UNEC və “Milli Aviasiya Akademiyası” komandaları arasında baş tutacaq. I turun “DH Volley” - “Abşeron” və “Gənclər” - “Murov Az Terminal” qarşılaşmaları Azərbaycan Voleybol Federasiyasına ünvanlanmış müvafiq müraciətlərə əsasən təxirə salınıb. Bu oyunların keçiriləcəyi tarix barədə əlavə məlumat veriləcək.

Qeyd edək ki, reqlamentə görə, çempionat iki mərhələdən ibarət olacaq - liqa (ilkin) mərhələsi və pley-off. Liqa mərhələsi dairəvi sistem üzrə, ev-səfər prinsipi ilə bir dövrədə keçiriləcək. Nəticələrə əsasən, 8 komanda pley-off mərhələsinə vəsiqə qazanacaq.

- Komandanız yeni mövsümə necə hazırlaşır?

- “Gəncə” voleybol klubunu müasir yanaşma ilə məqsədyönlü formalaşdırmışıq. Heyətimizə yeni oyunçular transfer etmişik. İstəyirik ki, medalımız olsun. Keçən il komandamız Azərbaycan Kubokunun gümüş mükafatçısı oldu. Qar voleybolunda isə üçüncü yeri tutduq. Amma əsas məqsədimiz Azərbaycan çempionatında medal qazanmaq idi. Təəssüf ki, medalımız olmadı, amma bu, bizi daha da gücləndirir. Ötən mövsümə çox yaxşı hazırlaşmışdıq. Müəyyən səbəblərə görə 4-cü yeri tuta bildik. İnanıram ki, bu mövsüm ən yaxşı çıxışımızı göstərəcəyik. İkiqat Olimpiya iştirakçısı, Asiya Oyunlarının qalibi keniyalı Şeron Çepçumbanı transfer etmişik. Bu il həm Azərbaycan voleybolunda, həm də Gəncəmizdə uğurlarımız olsun, maraqlı oyunlar izləyək. Yaxşı oyun göstərəcəyimizə inanırıq. Bilirsiniz ki, artıq komanda sayı artıb. Çalışacağıq ki, Gəncənin adını həm bölgədə, həm də ölkə miqyasında layiqincə təmsil edək.

- Heyətdə Gəncə voleybol məktəbinin yetirməsini görürük. Bu sahədə başqa hansı işlər aparılır?

- “Gəncə” Regional Voleybol Klubu tərəfindən bu sahədə böyük və yüksək səviyyədə işlər aparılır. Bildiyimiz kimi, Azərbaycan Voleybol Federasiyasının ən böyük planlarından biri də bölgələrdə bu idman növünün inkişafını təmin etməkdir. Artıq 9 regional klub fəaliyyət göstərir. Bu klublar regionda ciddi işlər görür və uğurlar qazanır. Daşkəsən regionu bu il uşaqlar arasında Azərbaycan çempionu oldu. İlk dəfə idi ki, uşaqlar arasında ölkə çempionatı keçirilirdi.

- Gəncədə hazırda voleybola maraq necədir?

- Artıq görürlər ki, böyük komanda formalaşıb və inkişaf edir. Ona görə də valideynlər övladlarını bu idman növünə yönəldirlər. Məncə, qızlar üçün ən yaxşı idman növü məhz voleyboldur. Bildiyiniz kimi, Çində də buna bənzər yanaşma var — idman edən xanımlarda bədxassəli xəstəliklərə rast gəlinmir. Üç idman növü var ki, onlarla məşğul olan xanımlar xərçəng xəstəliyinə tutulmurlar. Bunlar voleybol, üzgüçülük və velosiped idmanıdır. Voleybol həm qadınların inkişafına, həm də milli dəyərlərə xidmət edən növlərdən biridir.

- “Gəncə”nin bu mövsüm liqadakı əsas rəqibi kim olacaq?

- Bu il bütün komandalar güclüdür. Zəif komanda demək olar ki, yoxdur. Kimin zəif və güclü olduğunu meydanda görəcəyik.

- Azərbaycan voleybolunun hazırkı durumu barədə nə deyə bilərsiniz?

- Azərbaycan voleybolunda inkişaf nəzərə çarpır. Uşaq voleybolu yalnız paytaxtda deyil, regionlarda da inkişaf edir. Həm qızlar, həm oğlanlar arasında bu idman növünə maraq böyükdür. Federasiyanın da tapşırığı əsasında regionlarda seleksiya işləri aparılır.

Mənbə - AZƏRTAC

Birlikdə yeni uğurlara doğru!